Kata-kata: Blab 10

Sin-o mabato sa Barbero nga Ilonggo?

By Pepin

Wala man gyapon may maka pirdi sa barbero nga Ilonggo. Baliskad-baliskadon mo man ang ulo sang tawo, sa guihapon, ang gunting intsakto! Mu na guro nga lawig pirmi ang pilahay sa 3 Brothers Barber Shop ukon sa Twin Brothers Barber Shop kay damu ang gusto mag pagwapo.

Sa tuod-tuod lang, pirdi gid ya ang kano nga barbero, kay ang Ilonggo ya bisan nagakapiyong tadlong ang marka sang gunting kag indi papresyo.  Kag bisan bungi kag bakirason, todo ngirit man gyapon. Daw hari ka lang kung ila ikaw tulukon.

Ang manami pa sa mga ilonggo nga barbero, mahilig sila mag istorya. Halin sa pagkilalahay nila sang iya nobya asta sang nag bulaganay sila sang iya kirida, indi mag mala ang laway ya sa ka tikal kag ka bungisngis. Indi man makaluwas ang mga istorya nga la pulos kag kuris-kuris. Mu na gani nga pasakay ka na lang para indi siya mapahuy-an.

Kag ang pinakanami magpagunti sa Ilonggo nga barbero? Siyempre ang masahe sang ila nga mabaskog nga mga kamot. Daw ka tawhay lang pamatian ang ga lagtok lagtok nga tudlo sa imo likod, kag daw indi mu gusto matapos ang makatuluyo nga hilod sa imu dahi. Hay, sa kanami!

Kata-kata: Blab 09

Lab da talaba!

By pepin

Sin-o indi mahidlaw sa manamit kag mainit-init nga talaba? Bisan diin ka man nga parti sang kalibutan makaabot, pangitaon mo gid ining paborito nga sumsuman sang kadam-an.

Kata-kata: Blab 08

Pirmi ka “On the blue?”

By Pepin

Nagay ugtas! Indi pag pasakaa ang tensyon sa ulo mu, basi malupok ang mga ugat nga gakamang sa imo liog. Kung may gapakalain sa imo (baw, labi na gd ang mga higko dila), ukon may ginabatyag ka nga malain sa imo isigkatawo (anger towards thy neighbor), kum-a imu mga kamot kag sumbaga ang pader (say araguy! - and that's the spirit!). Halina ang tension sa isa kabagay nga wla pulos - kay actually amu man na ang mga tawo nga gina kainitan mu kag ga-init sa imu (spell "ang mga wala pulos").

Ibutang gid pirmi sa imo paminsaron (in the brain, amega!) nga ang swerte kag grasya indi makapalapit sa imo kung iban nga bagay ang gina isip mo, labi na gid kung problema ukon mga hinanakit (tirador, pakbong, kutsilyo -pili lang sang armas kung inkaso mag maoy ka). Dumduma bala, sang san-o na pirdi si Pacman sa boxing? Di bala sang gina panumdum ya ang mga problema ya samtang naga away sila ni Erik Morales? It was one of his “down” moments nga pwede man matabo sa imo career or life. Amu na gani nga dapat free ka from negative vibes kung gusto mo gid maging successful in your day-to-day life.

Huo, wala sang tawo nga wala ga ugtas, pero kung tam-an naman ka paminsar sang ulugtasan (ching-amak!), indi ka naman kapanumdum sang mayo para sa imo lawas. Indi ikaw maka focus sa imo handum kag goals in life. Ang isa pa ka bagay nga ibutang mo sa imo paminsaron amu sini, “Naga ugtas man bala sa imo ang gina ugtasan mo?” kung wala, then go on with your life. Wala ka man may makuha kung puro akig, reklamo, kag hinanakit ang ara sa imo kasing-kasing. Mu lang na.

Kata-kata: Blab 07

Nasubayan

By Pepin

Wala ka bala nagatingala kung nga-a wala ga-diabetikon ang mga subay kag langaw bisan pirmi sila nagapanamit kaon sang mga matam-is nga pagkaon?

Isa ka adlaw gin gaan ko sila sang mousse cake (abaw sosyal). Gin hulog ko lang ini sa lupa kag gin lantaw ko kung paanu sila nag hagaray magkaon. Pagakatpos sang lima ka minuto, napuno na sang pula nga subay ang cake kag nag umpisa na pamasyar ang mga langaw. May naghapon pa gid nga lagong. Sa kilid may mga guyum nga gusto mag intra sa pista, pero gin-snub sila. Wala ko gin sabad ang mga ini sa ila hilikuton. Nagpadayon ako sa pag obserbar.

Pagkadugay-dugay gin pamangkot ko kaugalingon ko, “wala man ni galingin ulo nila?” Indi ko ma take nga ako gani indi kaagwanta sang katam-is sang cake, pero sa ila daw sa wala lang (ang lagong daw seryoso gid). Nagpaminsar ako sang mga diabetikon nga tawo nga indi kapanamit kaon sang cake subong, pero ang mga subay kag langaw ya daw ka hisaon gid.

Dugay-dugay gin amat-amat tabunan sang mga pula nga subay ang cake sang balas kag gintago ini (nagdinalok guro sa lagong). Nag damo pa gid sila ka gang iban nanghagad pa gid sa iban nga baryo.

Sang indi ko na gid masabat ang akon pamangkotanon, nagdesisyon na lang ako nga batunon ang matuod base sa akon na obserbaran, kag gin liswahan ko ininit ang mousse cake ko (sin-o mas hisaon?).

Kata-kata: Blab 06

Sapat-sapat nga kasakit mangagat

By pepin

Kahibalo ka bala sang sapat-sapat nga ini? Sang madumduman ko daw halin pa sang Hulyo nag atake ang mga ini, pero asta subong daw wala pa ako makahibalo sang ngalan sini.

Ang lain pa mga ninong kag ninang kay kasakit gid sila mangagat. Nagahabal ang akon butkon kag batiis taga gab-i. Pati sa pagtulog ko ara sila. Bisan anu ko kapanabon habol, ara man sila guihapon.

Ang bal-an ko gina lagas ni nila ang suga, pero ambot kung anu ara sa suga nga die hard gid sila. Labi na gid kung manog ulan, ga guluwa sila ya. Very many gid sila. Pati ang mga suga sa billboard sa highway gina dumtan nila.

Nag kadto ako sa coffee break sang isa ka adlaw; ay abaw infested ang kapihan. Pati mga koryano ga talabid baba nila ka ugtas. Indi kasarang ang electric insect trap kag mosquito swatter sa ila. Pati mga butiki kag damang diri sa balay namun nasum-uran na sa mga sapat-sapat nga ini. Indi man katalab ang insecticide (daw nanamitan pa gani sila sprayhan). Indi ko man sila maubos kuha sang vacuum cleaner. Indi man effective ang insect repellant sa mga ini. Ang lain pa pagka kaagahon, damu-damu sila nga nagkalamatay sa sulog sang casing sang suga kag daw gin sunog ang baho nila.

Ahay, anuhon ta ni sila man? Saguron ta na lang guro ay kag sud-anon. basi pwede pa mahimu torta… batihon lang sa itlog.

Kata-kata: Blab 05

Ang Manamit Kag Mainit Nga Kape

By Pepin

Naanadan na sang kadam-an ang pagpangape kada kaagahon, labi na gid ang mga tigulang. Sin-o bala ang indi manami-an sang sabor sang kape? Siguro madamu man ang indi hilig sini, pero mas madamu pa gid ya ang indi makabatas nga indi maka-inom bisan isa lang ka tasa sang kape sa isa kaadlaw.

Ang matuod, madamu ka gid may madumduman kung ikaw gapangape. Tilawi bala sa bwas sa aga, mga alas singko y media, mag pungko sa balkonahe ninyo kag mangape (kung wala kamu balkonahe, mag lumpiga sa lupa sagwa balay niyo), kay damu dayon masulod sa inyo panumduman, pareho sang mga manami ninyo nga plano sa bilog nga adlaw, mga pag huna-huna nga indi mapatihan, kag labi na gid ang mga masadya nga nagkalatabo sa kabuhi mu sang una. Amu ini siguro ang rason nga-a mahilig ang mga tigulang mangape kay madamu lang sila may mapaminsar nga makapasadya sa ila (drama si lola! Hibi-hibi to the max dayon?).

Manami man mag inum kape tapos kaon kay daw kainit sa sulok-sulok, labi na gid kung busog-busog ka (tungod sa ka sungak-sungak mu man kis-a), ga talab gid dayon ang epekto sang kape sa tiyan mo. Daw mabatyagan mu nga daw kadasig ka matunawan sang kina-on mo (pati lugay mo nalumos sa kape).

Pero ako ya, hilig ako mangapi kung naga ubra ako, pareho subong nga ga-type ako sini. Dasig ako tuyhon kung wala kape sa tupad ko. Para sa akon, ang hamot pa lang  sang kape nagapamukaw na.

Te, mangape-ngape na ta mga coffeemates?

Kata-kata: Blab 04

Sang Wala Pa Farmville sa bukid

By Pepin

Katilaw ka hampang sa bukid? Ako nag daku ako sa bukid, kag daw halos tanan nga hampang sang kaberks ko sa baryo namun na memorize ko na. kaagi ako panamang sa ginatamnan kadios, tiru-tiru sulpot, napilasan sa kilay tungod sang pikyaw, kag nabakirasan sang sobra kadalagan pag tumba patis kag sikyo.

Pero ang paborito ko gid nga kalingawan sa bukid amu ang pagpadalus-os paklang sang lubi. Pinaka ka sadya gid ni hampangon kay daw ara ka lang sa roller coaster. Bisan makapoy ini, masadya man gyapon kay damu kami ang nagahampang.

Bal-an mu sa likod balay namun sa baryo, may malapad nga banglid, kung sa diin may daku-daku nga kahoy sang passi (bugnay) kag balayong (ang bunga sini gina himu namon nga espada espada, kag gaespadahanay kami). Halin sa ibabaw sang banglid, ma slide kami paidalum paagi sa pagsakay sang paklang. Dapat sagad kami mag balance-balance para indi kami magbulidbulid sa tunga sang banglid. Ang paklang pwede nga may dahon pa, ukon ang gin tapyasan na. Mas mayo nga ang gintapyasan nga paklang ang gamiton para indi mabug-at dal-on pasaka balik sa ibabaw sang banglid.

Ang pinakamasadya kung may isa sa amun ang ma ligid sa tunga-tunga sang iya pagpadalus-os kag mag tupa sa ipot sang karbaw. May ara ako nga migo nga gin sakam ya gid ang mainit kag mabasa-basa nga birthday cake sang karbaw sang lolo ko. Ang iban gin naghulid man sa ipot, galing kay mala lang to ya. Siyempre indi madula nga may ma pilasan, may masulsulgan, ukon may mabakirasan sa amun.

Manami kay na-agyan ko pa ang makahampang sini, kay subong daw puro na lang computer ang kalingawan sang mga bata sa baryo namun (ga hampang online games pareho sang DOTA, Farmville, kag Counterstrike). Di bala sosyal na bisan ang mga taga-uma subong? Basta mahambal ko lang, masadya kag makalilingaw ang pagpadalus-os paklang. Pangita to bala banglid kag tilawi hampang.

Kata-kata: Blab 03

Manuya ukon indi manuya?

By Pepin

May ara nga tawo nga manuya sa imu nga wala rason. Agud mapagwa mu ang init sang ulo mu sa iya, mangita ka sang paagi para makabalos. Pero amigo, indi mayo nga ibalos mo sa iya ang mismo ya gin ubra – indi mu sya pag suyaan kung gin suyaan ya ka una.

Simple lang meg, indi lang pagsapaka bala. Bal-an mo kis-a, naga panghalit ang tawo kay kulang lng na sa pansin – basi kulang lang sa pagpalangga sang ginikanan, ukon indi ya ma ipakita ang iya kusog sa simple nga bagay, amu ina nga gapangita siya away para mapabatyag ya nga “kaya ya” ang sitwasyon bisan siya lang isa.

Te kung indi mu siya pagsapakon, amu ini ang manami – madugang ang libog sang ulo ya eh. Nu pa bi? Ipa batyag mu sa iya nga indi effective ang strategy ya nga mang-away. Sa mahapos nga tinaga – mang “pissed off” ka agud ma offend sya sang iya mismo nga gin ubra.

Kung ma himasmasan na siya sang gakalatabo, ukon na paminsar ya na ang iya sala nga gin himu, amu na ina ang oras nga istoryahon mu siya sang matarong. Bal-an mu meg, ang tanan nga indi pag intindihanay mabulong sang simple nga istoryahanay. Atubanga siya sang matarong kag indi mag binata-bata nga iyawyawon mu siya.

Pero meg, kung gin sumbag ya ka, ukon gin amakan abay nga gin suyaan, ay te lain na ini nga istoryahanay. Tawga si hepe kag ipablotter na sang daun. Basi malusbot pa kilid mu kung balusan mu siya.

Kata-kata: Blab 02

Pagkatay to the Max:

Indi Man Sila Brutal Ah!

By Pepin

Madamo sa aton ang nanamitan mag kaon sang fried chicken, fried pork, kag fried beef (tapa bala!). Siyempre, sa hamot pa lang kag sa galatab nga mantika sini, indi ka bala ma ganahan? Pero kaagi ka na bala kita kung paanu ihawon ang mga kasapatan nga gina sumsuman mu?

Ang pagkatay sang baboy indi simple, kag paagi sa akon nga nasaksihan, gina higtan ang apat ka tiil sini kag gina labo sa li-og. Samtang gina gapos, grabe ang iya pag iwik. Nalu-oy ako samtang gina obserbahan ko ang iya pag antos. Pero ang kanamit sang dinuguan (parisan pa gid sang puto…pak), ang hamot sang chicharon bulaklak, kag ang kananam sang siki sini sa KBL ang ara sa ulo ko. Te maluoy ka pa bala kung indi mu gusto magutman?

Kung ang baboy kaluluoy, mas pa gid ang baka. Pista sadto sa amun kag mga alas kwatro pa lang sang kaagahon sang bispiras sang pista gin katay ang baka ni lolo. Siyam katawo ang nagbuliliganay para maubra lang ini, kag shocking sang akon nakita kay gin lampusan sang wasay ang agtang sang baka (baw! Bet gid eh!). Lingin ang ulo sang baka (anu-anu ya lang ang nagtunga sang isa ka pistil nga tuba man?), kag natumba ini samtang naga “moo…moo!” Nagsulod ako sa balay sang makadali, kag pagkabalik ko sa sagwa, gina kiskisan na ang panit sini.

Ang manok daw kasimple lang katayon. Mainit anay sang tubig kag samtang gina hulat ini mag bukal, gina gulgulan ang liog sang manok (dusak gid ang jugular vein). Ginasalod ang dugo kay pwede pa ini ma lakot sa tinola (indi ko na ya ka uyon). Ang paborito ko gid nga part sang manok amu ang ulo sini, amu na nga kung mag-ihaw sila manok sa balay, kinanlan manami ang pagtinlo sang ulo (namit gid ya ang utok kag ang mga mata). Pero kis-a indi lahog-lahog ang mag-ihaw manok kay may ara nga beses nga bisan na gulgul mu na ang liog, ga lupad man gyapon (yawat!).

Sa lain-lain nga paagi sang pagkatay sang mga sapat nga gina kabig natun manamit sud-anun, mahampang ka pa bala Farmville? (Leche nga pamangkutanon).

Kata-kata: Blab 01

Beer Time is Meal Time

By Pepin

Nga-a ang mga tawo, labi na gd ang mga ilonggo hilig mag ma-uy kng matam-an ka inom? Anu ang ara sa beer nga makapahubog? Alcohol? Indi bala gna limpyo ina sa pilas. Kaina lng gn limpyuhan ko pilas xng ido ko xng alcohol. Pwede gle beer sa pilas pre? La ka nag siling daun, te may ara to gale beer sa rep, nagbakal pa ko sa mercury drug store xng Isopropyl alcohol with moisturizer. Ah linchowkan! Hinubog nga istoryahanay ni.

Sadya gd mag inum-inum, labi na gd kng wla ka may kinan-an, dasig ka ma tipsy…asus tipsy… hubog naton…. Ari: Sadtong una nga tiyempo, na hubog ako sa Juan’s Place…ambot kung may nakadumdum pa xng lugar nga ni? Daw anum na ka tuig ang nagligad. Nagsuka ako kag gn ligid-ligidan ko pa gd ang suka xng klasmyt ko nga kribal ko sang 1st year hayskul. Ahay nga tiyoy, nag dinamak. Wara ka maan si iloy nga ga ligid sa suka si toto sa ‘lilo. Pero namit man gle mag batang-batang sa mapilit kag mainit nga suka, labi na gd ang baho daw redhorse man.

Pero mu lang ni nabal-an ko, wala ko ya ga pati nga kung hubog ka, ga palangdulum ang paminsaran mu. Ngaa man? Samtang ga batang ako sa suka sadto, may tuyo tani nga magkuha sang wallet ko. Gin kaptan ko iya kamot kag gin pamangkot, “Pila gd bala kinanlan mu?” hambal ya: “syen pre.” Gin buksan ko akon wallet kag gin isip ang mga sinsilyo asta makadab-ot syen, kag sang matapos ko na isip, gin butang ko balik wallet ko sa bulsa ko, gin kabidan sang chain, kag nagbalik himlay sa suka kag nag moan moan… ahay mauy dun si tiyoy.

Kahuruya,?… labot ko?... Te inom ta pre? Tambay-tambay lng. Didto sa Langford’s ukon sa Ryan’s. Pero mayo gd ya kung sa balay lng. wala damu gasto, kag may banyo nga sukahan. Mu lang na tani akon… te mu man na imu?